«Այբ» դպրոցում տեղի ունեցավ «Ժամանակակից գրականություն. ինչ կարդալ» խորագրով առցանց պանելային քննարկումը, որի խոսնակներն էին «ԵՐԵՎԱՆ» ամսագրի գլխավոր խմբագիր, գրող Արտավազդ Եղիազարյանը, գրականագետ, «Անտարես» հրատարակչության գլխավոր խմբագիր Արքմենիկ Նիկողոսյանը և «Այբ» դպրոցի հայոց լեզվի առարկայախմբի ղեկավար, դպրոցի ՀԽ անդամ և Հայաստանի ամերիկյան համալսարանի դասախոս Անահիտ Հովհաննիսյանը: Հանդիպումը վարում էր «Այբ» դպրոցի 2014 թվականի մենտոր-շրջանավարտ Գայանե Արամյանը։
Հանդիպման բացումն արեց Սաթենիկ Մաղաքյանը Չարենցի «Տաղ՝ ձոնված գրքերին» բանաստեղծության ասմունքով։
Քննարկման ընթացքում բարձրացվեցին մի շարք հարցեր, որոնցից մեկն էր այն, թե արդյո՞ք հարատև է գրքի ֆենոմենը, թե ոչ։ «Այո՛, գիրքը ֆենոմեն է, և վերջին գիրքը կանհետանա միայն վերջին մարդու հետ», - պատասխանեց Արքմենիկ Նիկողոսյանը։
Քննարկվեցին ժամանակակից հայ գրողների հաջողությունները, նրանց նպատակը՝ գրական գործ ստեղծելիս։ Այն հարցին, թե ինչ խնդիրներ կան գրող-հրատարակիչ հարաբերություններում, պրն Նիկողոսյանը պատասխանեց, որ աշխատանքային կազմակերպման տեսանկյունից խնդիրներ չկան․ հիմնական խնդիրները կապերը ավելի դինամիկ և արդյունավետ դարձնելու մեջ են։
Խոսվեց նաև այն մասին, թե ինչ է փնտրում ընթերցողը գիրք կարդալիս։ «Ես՝ որպես ընթերցող, փնտրում եմ այլընտրանքային գրականություն։ Ինձ հաճելի է փախչել իրականությունից և գտնվել այն իրականության մեջ, որը գրողը ստեղծում է», - ասաց Անահիտ Հովհաննիսյանը։
Արտավազդ Եղիազարյանը նշեց, որ երեխային հնարավոր է սովորեցնել գիրք կարդալ՝ նրան ճիշտ պահին ճիշտ գիրք տալով։ Իսկ Արքմենիկ Նիկողոսյանն ավելացրեց, որ ընթերցասեր հասարակություն ունենալու համար ժամանակակից գրողները պետք է գրեն այն մասին, ինչ կատարվում է հենց հիմա։
Հանդիպման ավարտին խոսնակները վերհանեցին հետևյալ ժամանակակից ստեղծագործությունները, որոնք խորհուրդ են տալիս կարդալ միջին և ավագ դպրոցի աշակերտներին․
Արտավազդ Եղիազարյան – «Վիշապաքարի գաղտնիքը»,
Հրաչյա Սարիբեկյան – «Երկվորյակների արևը»,
Գրիգ – «Առևանգում, որ ցնցեց կատուների քաղաքը», «Հիսուսի կատուն»,
Մհեր Իսրայելյան – «Մինչև մեռնելն ապրել է պետք», «Ես եմ աշխարհի թագավորը»,
Նիլ Գեյման – «Ամերիկյան աստվածներ»,
Վահրամ Մարտիրոսյան – «Բամբակե պատեր»,
Իլֆ և Պետրով – «12 աթոռ», «Ոսկե հորթը»,
Գուրգեն Խանջյան – «Ներսուդուրս»,
Համբարձում Համբարձումյան – «Կորեական դելիկատես»։
Արմենուհի Ստեփանյան, 10-րդ դասարան
Հանդիպման ձայնագրությունն այստեղ։
Կիսվել