Ամփոփվեց «Այբ» դպրոցի, «Այբ» կրթական հիմնադրամի ու ՀԲԸՄ հայաստանյան ներկայացուցչության եռակողմ կրթական ծրագիրը, որի շնորհիվ մարզերի երեք տասնյակ աշակերտներ կարողացան օգտվել լավագույն կրթություն ստանալու հնարավորությունից։
2017-2018 ուսումնական տարում «Այբ» դպրոցի հոգաբարձուների խորհրդի որոշմամբ առաջին անգամ «Այբ» ավագ դպրոցն իրականացրեց մարզային հատուկ ընդունելություն 10-րդ դասարանների համար՝ միայն մարզերից դիմորդների (23 աշակերտ) մասնակցությամբ։ Հատուկ ընդունելությամբ դպրոց ընդունված բոլոր աշակերտներին տրամադրվեց ամբողջական ֆինանսական աջակցություն ուսման երեք տարիների ընթացքում (տարեկան ԸՄԳ-ի 80-ից բարձր լինելու դեպքում), ինչպես նաև ապահովվեց Երևանում կեցության հնարավորություն ՀԲԸՄ «Վահե Կարապետյան» կենտրոնում։ Այդ աշակերտները համալրեցին «Այբ»-ի 8-րդ սերնդի շրջանավարտների շարքերը։
Բացի սրանից, ամեն տարի «Այբ» ավագ դպրոց բարձր միավորներով ընդունվող մինչև 5 աշակերտ՝ ՀՀ մարզերից ու Արցախից, ստանում է ամբողջական ֆինանսական աջակցություն՝ անկախ ընտանիքի վճարունակությունից, ինչպես նաև Երևանում կեցության հնարավորություն։
2019-20 ուսումնական տարում այս ծրագրից օգտվեց և կացարանում բնակվեց «Այբ» ավագ դպրոցի 30 աշակերտ ՀՀ ու Արցախի տարբեր ծայրերից։
Եռակողմ ծրագրի մասին մանրամասները «Արմենիա» հեռուստաընկերության «Բարի լույսի» տաղավարում ներկայացրին «Այբ» դպրոցի համայնքի գծով տնօրեն Աննա Ակոպյանը և ՀԲԸՄ հայաստանյան ներկայացուցչության հատուկ ծրագրերի ղեկավար Ինեսսա Մարգարյանը։ Հաղորդմանը տեսակապով միացան նաև աշակերտական համայնքի ավագ համակարգող Արմինե Բաբայանն ու ծրագրի շահառու երկու աշակերտ։
Կիսվել