Նախագծային ուսումնառություն. 2020-2021

«Այբ» դպրոցի նախագծային ուսումնառության շրջանակում 2020-2021 ուս․ տարում գործելու են 10 ակումբ։

Այս տարվա ակումբների գործունեությանը կարող եք ծանոթանալ ստորև։

Ֆիլմարտադրության ակումբ

Ղեկավար՝ Արուսիկ Զախարյան

Նախագծի անվանում՝ «Թաքնված գանձերի հետքերով»

Նախագծի նկարագրություն։ Նախագծի նպատակն է ստեղծել հեռուստաֆիլմ, որը մերօրյա Արցախյան պատերազմը կներկայացնի սեփական տեսանկյունից՝ անդրադառնալով մարդ-մշակույթ-եկեղեցի անխախտ եռամիասնությանը: Ակումբը բարձրացնում է Արցախյան պատերազմի արդյունքում անորոշ ճակատագրի մատնված պատմամշակութային ժառանգության պահպանության ու հանրության տարբեր շերտերին այն ներկայացնելու խնդիրը:

Նախագծից ակնկալվող արդյունքներ։ Հանրությանը ներկայացնել Արցախյան պատերազմի պատմական հիմքը, որի արդյունքում դիտողն ավելի լավ կհասկանա արցախյան մշակութային ժառանգության պահպանման կարևորությունը, ներկայացնել հայի և նրա ստեղծած դարավոր մշակույթի անբաժան կապը:

Նախագծի վերջում նախատեսվում է ունենալ 20-25 րոպե տևողությամբ, անգլերեն ենթագրերով հեռուստաֆիլմ կամ ֆիլմ-եռագրություն՝ յուրաքանչյուր մասը 7-8 րոպե տևողությամբ:

«Այբպրես» ակումբ

Ղեկավար՝ Քրիստինե Քյուրքլյան

Նախագծի անվանում՝ «Այբ 10/10»

Նախագծի նկարագրություն։ Ակումբն այս ուսումնական տարվա ընթացքում իրականացնելու է «Այբ»-ի տասնամյակին նվիրված նախագիծ։

Նպատակն է խորապես ուսումնասիրել մեր դպրոցի ստեղծման դրդապատ-ճառները, տասը տարվա անցած ճանապարհը և իրականացրած գործունեությունը, նաև այն ամբողջությամբ հավաքել մի տեղ ու «Այբ»-ի հոբելյանական տասնամյակին ներկայացնել որպես նվեր։

Այս նպատակն իրագործելով՝ մարդկանց կկարողանանք լավագույնս պատմել «Այբ» դպրոցի մասին։

Ֆ8 ակումբ

Ղեկավար՝ Արեգ Բալայան

Նախագծի անվանում՝ «Բաց արվեստ»

Նախագծի նկարագրություն։ Նախագծի նպատակն է՝ բացահայտել չբացահայտված ու անհայտ արվեստագետների (երաժիշտ, նկարիչ, լուսանկարիչ, գրող և այլն), այնուհետև ֆոտոպատմություններ ստեղծել նրանց մասին և տարածել, որպեսզի մարդիկ տեսնեն ու ճանաչեն ժամանակակից արվեստն ու այն կերտողներին և աջակցեն նրանց։

Ակնկալվող արդյունքներ։ «Բաց արվեստ» նախագծի միջոցով լուսաբանել մերօրյա երիտասարդ (որոշ դեպքերում չգնահատված) արվեստագետների ստեղծագործական գործունեությունը։

«Արվեստանոց» ակումբ

Ղեկավար՝ Մարի Ադամյան

Նախագծի անվանում՝ «Արտադաս»

Նախագծի նկարագրություն։ Նախագծի նպատակն է միջին դպրոցի աշակերտների նկարչական և ստեղծագործական հմտությունների զարգացման ուղիների մշակումը։ Նախագծի իրականացման շրջանակում ակումբը փորձում է լուծել աշակերտների շրջանում տարածված՝ ինքնուրույն ստեղծագործելու և սեփական գաղափարները զարգացնելու կաշկանդվածության խնդիրը։

Նախագծից ակնկալվող արդյունքներ։ Նախագծի ավարտին նախատեսվում է ունենալ արվեստի ուսումնական ծրագիր՝ արվեստի դասերի, տեսանյութերի, խաղերի ձևով, որոնք վերաբերելու են նկարչության տարբեր կողմերին։ Ծրագիրը հանրությանը ներկայացնելու և գործարկելու նպատակով ակումբը պատրաստվում է իրականացնել ուսումնական միջոցառումների շարք Երևանի և ՀՀ մարզերի մշակութային կենտրոններում։

Ղեկավար՝ Մարի Ադամյան

Նախագծի անվանում՝ «Draw the Justice»

Նախագծի նկարագրություն։ Նախագիծը նպատակ ունի ծաղրանկարների և նկարազարդումների միջոցով լուսաբանել մեծ հնչեղություն ու կարևորություն ունեցող թեմաներ։ Արդեն իսկ հաջողված փորձերից է 2020 թ․ հայ–ադրբեջանաթուրքական պատերազմի ընթացքում ստեղծված և հրապարակված ծաղրանկարների և նկարազարդումների շարքը, որն անմիջականորեն կապված էր հայ ժողովրդի դեմ սանձազերծված ագրեսիայի հետ։ Այս կերպ «Արվեստանոց» ակումբը փորձում է հակադարձել մեդիադաշտում լայնորեն տարածված ապատեղեկատվությանն ու քարոզչությանը։

Նախագծից ակնկալվող արդյունքներ։ Որպես վերջնարդյունք՝ նախատեսվում է ունենալ նկարազարդումների և ծաղրանկաների շարք, որոնք հետագայում կցուցադրվեն ցուցահանդեսի ձևով:

«Ռոքեստր» ակումբ

Ղեկավար՝ Վահագն Պապայան

Նախագծի անվանում՝ Made in Armenia

Նախագծի նկարագրություն։ Նախագծի նպատակն է հայկական որակյալ երաժիշտների և երաժշտախմբերի բացահայտումը, լուսաբանումը և նրանց ստեղծագործությունների արխիվների ստեղծումը:

Ակնկալվող արդյունքներ։ Հանրությանը ներկայացնել և հասանելի դարձնել հայկական որակյալ երաժշտությունն ու դրա գաղտնիքները:

Նախագծի վերջում ակնկալվում է ունենալ համերգ՝ մերերաժշտախմբի և ուսումնասիրվող խմբերի ու անհատների մասնակցությամբ, ինչպես նաև Հայկական ռոք ասոցիացիայի հետ համագործակցությամբ ստեղծել առցանց հարթակ՝ հայկական ռոքի արխիվների և թարմացումների համար:

«Տեխնոշարժ» ակումբ

Ղեկավար՝ Ալեքսանդր Մելիքյան

Նախագիծ 1, Համագործակցություն մեդիագիտակների հետ

Նախագծի նպատակը մեդիագիտակներին օգնելն է՝ ստեղծելով նրանց համար հարթակ՝ մշտապես հասանելի կայք, որտեղ նրանք կկարողանան տեղադրել իրենց հոդվածները հանրության համար։

Նախագծից ակնկալվող վերջնարդյունքն այն կայքն է, որը հնարավորություն կտա մեդիագիտակների անդամներին հանրությանը ներկայացնել իրենց հոդվածները և վերլուծությունները։

Նախագիծ 2, Կայք մշակութային կոթողների մասին

Նախագծի նպատակն առցանց հարթակի ստեղծումն է Արցախի և Հայաստանի Հանրապետության տարածքներում հայկական մշակութային կոթողների պատմության մասին տեղեկություններ ու փաստեր հավաքելու համար։ Հարթակը հետագայում կարող է ծառայել որպես ճամփորդական կայք։

Նախագծից ակնկալվող վերջնարդյունքն այն կայքն է, որում ամփոփված կլինի մի շարք մշակութային կոթողների վերաբերյալ տեղեկություն։

Ինժեներական ակումբ

Ղեկավար` Վազգեն Գաբրիելյան

Նախագծի անվանում` «Սարտար»

Ինժեներական ակումբն այս տարի աշխատում է «Սարտար» նախագծի վրա։ Աշակերտները պատրաստվում են ստեղծել բազմագործառական ռադիոազդանշանային սարքի նախանմուշ: Այն թույլ կտա օգտագործողին գտնվելու վայրի մասին տեղեկություններ հաղորդել ռադիոազդանշանային հեռարձակման եղանակով: Ազդանշանի ընդունումը նախատեսվում է կատարել նույն սարքի մեկ այլ օրինակով (համապատասխան կարգավորումով):

«Ուրբանիստ» ակումբ

Ղեկավար՝ Աստղիկ Գրիգորյան

Ակումբի նպատակն է քաղաքային միջավայրի բարելավմանն ուղղված նախագծային հայեցակարգերի մշակումը՝ հավատարիմ մնալով կայուն զարգացման սկզբունքներին։

Այս տարի ակումբը մշակում է «Ուսուցանող այգի» նախագծի հայեցակարգը, որի իրագործումը նախատեսվում է «Այբ» դպրոցի տարածքում։

Դպրոցներում չկա համապատասխան միջավայր, որը կնպաստի բնության հետ աշակերտների կապի ապահովմանը, ինչպես նաև նրանց բնագիտական գիտելիքները գործնականորեն փորձարկելուն։ Բացի դրանից, քաղաքների զարգացմանը զուգընթաց մեծանում է քաղաքային միջավայրի էկոլոգիական աղտոտվածության ռիսկը։

Պլանավորում ենք իրականացնել նախագիծը՝ ներգրավելով ուսուցիչներին և աշակերտներին հայեցակարգի մշակման գործընթացում։ Արդեն իսկ սկսել ենք դիտարկել առանձին տարածքներ տարբեր տարիքային խմբերի համար։

Արդյունքում կբարձրանա բնության և շրջակա միջավայրի հանդեպ հոգատարությունը, կձևավորվի փոխկապակցվածություն գիտության տարբեր ճյուղերի միջև, կստեղծվի գործնական դասերի հարթակ մի շարք դպրոցական առարկաների համար, ինչպես նաև կբարելավվի երեխաների և բնության միջև անմիջական կապը։

«Սեդիագիտակներ» ակումբ

Ղեկավար՝ Արամ Աբրահամյան

Նախագծի անվանում՝ «Մեդիագրագիտություն»

Նախագծի նկարագրություն։ Նախագծի նպատակն է բարձրացնել մեդիագրագիտության ընդհանուր մակարդակը Հայաստանի Հանրապետությունում և ոչ միայն։

Նախագծից ակնկալվող արդյունքներ։ Օգնել մարդկանց ծանոթանալու տեղեկատվական դաշտի առանձնահատկություններին՝ առանց հատուկ դասընթացների, սոցիալական դաշտը դարձնել ավելի ապահով՝ գիտակցելով մեդիայի ազդեցությունը մարդկանց վրա և զերծ մնալով մանիպուլյացիայից։

Նախագծի վերջում նախատեսվում է ունենալ կայք, որտեղ պետք է հրապարակվեն ակումբի պատրաստած հոդվածները, տեսանյութերը, պաստառները և այլն։

Ծրագրավորման ակումբ

Ղեկավարներ՝ Նվեր Աբգարյան, Վլադ Խոյեցյան

Նախագծի անվանում՝ «Բոլոլա»

Նախագծի նկարագրություն։ Մեր նախագիծը նպատակ ունի ստեղծելու բջջային հավելված, որը կտրամադրի Երևան քաղաքում A կետից B կետ տանող երթուղիների ցանկը։ Մենք փորձում ենք լուծել տրանսպորտի խնդիրը։

Ակնկալվող արդյունքներ։ Ակնկալում ենք, որ հավելվածում բոլորը կկարողանան վերբեռնումներ կատարել, նաև քաղաքապետարանի աշխատողները կկարողանան երթուղիները վերբեռնել։ Իսկ հավելվածից օգտվողը` Երևանի քաղաքացի թե հյուր, կկարողանա ստանալ իրեն անհրաժեշտ երթուղիները սպասարկող տրանսպորտային միջոցների հստակ համարները։

Film Factory ակումբ

AybPRESS ակումբ

F8 ակումբ

Արվեստանոց ակումբ

Ռոքեստր

Տեխնոշարժ ակումբ

Ինժեներական ակումբ

Ուրբանիստ ակումբ

Մեդիագիտակների ակումբ

Ծրագրավորման ակումբ

Կիսվել

[[tags:1:1]]

Tweets by AybSchool
>