Տատյանա Շիշովայի և Մարիաննա Բեզրուկիխի սեմինարը «Այբ» դպրոցում

«Նոր ժամանակ. արդյունավետ կրթություն» խորագրով կրթական համագումարի շրջանակում «Այբ» դպրոցում հյուրընկալեցինք ուսուցիչների համար նախատեսված բացառիկ սեմինար։ Այն վարեցին կրթական ոլորտի անվանի մասնագետներ Տատյանա Շիշովան և Մարիաննա Բեզրուկիխը:

Հոգեբան, ուսուցիչ, արվեստաբույժ, տիկնիկաբուժության մեթոդի հիմնադիր, արվեստաբույժների և արվեստի ուսուցիչների միջազգային միության համանախագահ, Ընտանիքի և երեխայի սոցիալական ու հոգեբանական օգնության հիմնադրամի փոխնախագահ Մարիաննա Բեզրուկիխի սեմինարը վերաբերում էր տիկնիկաբուժությանը՝ որպես հոգեբանական մանկավարժության արդյունավետ գործիքի։ Ըստ Մարիաննա Բեզրուկիխի մեթոդի՝ տիկնիկներով խաղալիս երեխան վերարտադրում է ընտանեկան կյանքի տարբեր իրավիճակներ, ինչով կարող է արտահայտել իր հաճախ բացասական զգացմունքները։ Տիկնիկները երեխային օգնում են հաղթահարելու ստրեսը, ազատվելու վախերից, ինչպես նաև զարգացնելու հիշողությունն ու ուշադրությունը։

Պրոֆեսոր, մանկավարժական գիտությունների դոկտոր, Մոսկվայի մանկավարժական համալսարանի Նախագծման և կրթական ձեռներեցության դպրոցի «Բիզնես և մանկավարժություն» մագիստրոսական ծրագրի ղեկավար Տատյանա Շիշովան բանախոսեց մասնավոր դպրոցում ուսուցիչների ընտրության չափորոշիչների մասին։

Կրթության համագումարի կազմակերպիչն էր Երիտասարդ առաջնորդների աջակցման հիմնադրամը, գործընկերներն էին Մոսկվայի արտաքին տնտեսական և միջազգային հարաբերությունների վարչությունը և «Այբ» դպրոցը։

Կիսվել

Tag News Tag Լուրեր

Tweets by AybSchool
>